Óskilamunir sem fundist hafa í Hópinu og á fótboltasvæðunum verða "útbreiddir" í búningsklefahúsinu (við hliðina á því Gula) á milli kl. 13:00 og 17:00 á morgun, þriðjudag.

Kennir þar ýmissa grasa, að sögn Begga, hins eina sanna, sem stendur fyrir þessari sýningu.

Kíkið endilega við.

Suðurnesjameistarar í A-liðum 5. flokks. Frá vinstri: Ævar Andri Ámundínusarson, Hilmar Andrew McShane, Sigurður Bjartur Hallsson, Daníel Andri Pálsson, Ingvi Þór Guðmundsson, Magnús Ari Stefánsson, Boris Jugovic og Ingi Steinn Ingvarsson. Lengst til hægri er svo Alex Ferguson.

Keppt var á Suðurnesjamóti 5. flokks í Reykjaneshöllinni í dag og eiga allir strákarnir 24 stórt hrós skilið fyrir sína þátttöku.

Strákarnir hafa flestir sýnt miklar framfarir frá því í vetur, sérstaklega hvað varðar að standa rétt í vörn, senda boltann með réttum hætti og að reyna virkilega á sig frá fyrsta flauti til hins síðasta.

A liðið gerði sér lítið fyrir og snéri heim með bikar, en varla var veikan blett að finna á liðinu í dag. Boltinn gekk vel milli manna, frábær einleikur sást á köflum, eigingirni var hverfandi, erfitt var að komast í gegnum vörn okkar og marktækifærin voru vel nýtt. Komu flestir þjálfarar annara liða til mín og hrósuðu þessum strákum sérstaklega fyrir flottan og einbeittan leik. Strákarnir unnu fjóra leiki (Keflavík 2, Njarðvík, Reyni og Víði) og gerðu eitt jafntefli (gegn Keflavík). Þeir skoruðu 12 mörk og fengu aðeins á sig 1, sem er mjög athyglisvert. Þetta dugði til sigurs og fengu strákarnir bikar að launum, sem fyrirliðinn Boris tók við við mikinn fögnuð félaga sinna og hlupu þeir sigurhring að verðlaunaafhendingu lokinni.

B liðunum var skipt í tvö jöfn lið en þrátt fyrir það var annað þeirra aðeins hársbreidd frá því að komast í úrslitaleikinn.

B1 tapaði þremur leikjum á mótinu og gekk ekki nógu vel að sækja að marki andstæðinganna. Varnarleikurinn var hins vegar ekki sem verstur, en liðið fékk  á sig 6 mörk í 4 leikjum. Þeir unnu hins vegar góðan sigur á Njarðvík í lokaleiknum og náðu því að fagna sigri, en enduðu í 7.sæti af 8 liðum. B2 gekk mjög vel og unnu Keflavík2 og Njarðvík en töpuðu fyrir Keflavík4 í riðlinum. Þrjú lið enduðu efst og jöfn í riðlinum en því miður vorum við með lökustu markatöluna af þeim og spiluðum því úrslitaleik um 5. sætið gegn Þrótti Vogum (a-lið). Hann var æsispennandi og eftir markalausan leik var farið í vítakeppni. Gabríel Þór og Sverrir Týr skoruðu af fádæma öryggi úr sínum spyrnum, en það var enginn annar en 6. flokks maðurinn Sigurjón sem tryggði okkur sigur með því að verja 2 vítaspyrnur af 3! Sigurjón átti að taka síðustu spyrnu okkar, í nokkurs konar verðlaun fyrir að taka að sér markmannsstöðuna í mótinu, en með því að verja tvær var engin þörf á því að taka síðustu spyrnuna.

Takk fyrir skemmtilegt mót, strákar og foreldrar. Þið gerðuð mig virkilega stoltan með ykkar frammistöðu og segi ég það og skrifa að ef ekki koma margir meistaraflokksleikmenn út úr þessum flokki í framtíðinni, þá yrði um algjört vindhögg að ræða.